“සෙනෙහසේ දෑතින් ලොව දිනන සදහම් සිසිලෙන් සිත් නිවන පින්බිම”

“ශතවර්ෂයකට ආසන්න අතීත උරුමය සහ අනාගත ප්‍රඥාවේ මාවත – රත්නපුර බෞද්ධ මන්දිරය”

1931 වසරේදී අතිපූජ්‍ය බිබිලේ ඥානසිරි ස්වාමීන්ද්‍රයන් වහන්සේගේ සහ අමරණීය ශ්‍රීමත් අනගාරික ධර්මපාලතුමාණන්ගේ මූලිකත්වයෙන් හා මගපෙන්වීමෙන් රත්නපුර බෞද්ධ මන්දිරයේ සදාකාලික අඩිතාලම වැටුණි. එසමයෙහි රත්නපුර ප්‍රදේශයේ පැවති ආගමික පාසල් පද්ධතියට විකල්පයක් ලෙස, හෙළ බෞද්ධ සාරධර්මවලින් පිරිපුන් පරපුරක් බිහිකිරීමේ අරමුණින් මෙම පින්බිම බිහිවිය.

ආරම්භයේදී මෙහි පහළ මාලය ආගමික වතාවත් සඳහා වෙන් වූ අතර, ඉහළ මාලය “ධර්මපාල විද්‍යාලය” නමින් සිංහල බෞද්ධ අධ්‍යාපනයේ කේන්ද්‍රස්ථානය බවට පත්විය. දශක ගණනාවක් පුරා දහස් සංඛ්‍යාත දරුවන්ගේ නැණැස පාදා, පසුව රජයට භාර කෙරුණු එම ඓතිහාසික මෙහෙවරේ ශක්තිය අදටත් මෙම බිම තුළ සජීවීව පවතී.

අද වන විට රත්නපුර බෞද්ධ මධ්‍යස්ථානය යනු, එම ශ්‍රේෂ්ඨ ඉතිහාසයේ ආශිර්වාදය පෙරදැරිව, සමාජයීය හා අධ්‍යාත්මික සුවය සලසන ප්‍රදේශයේ ප්‍රධානතම සදහම් නිකේතනයයි.